يا خيل الله اركبي… يا خيل الله اركبي… ياخيل الله اركبي… والى الله ارغبي
Waxa u yimid baaqii jihaadka, dad ay ku kalsoon-yihiin, oo agtooda miisaan iyo maamuusba ku leh, ayaa soo gaadhsiiyay baaqaasi, waxa loo sheegay, oo dhambaal-waduhu uu soo gaadhsiiyay, in walaalahoodii muslimiinta ahaa ay aad u dhiban yihiin, oo ay maanta hiil uga baahan yihiin, in dhulkii muslimiinta la doonayo in la qabsado, oo cadawgii aan tudhaale iyo naxariis midna lagu ogeyn, uu ku soo duuley, kadibna way is-abaabuleen, sahay iyo saadba wixii ay heli karayeen ayaa ay habeysteen, waxay u dhaqaajiyeen bartii uu jihaadku ka socday.
Markii ay gaadheen bartii ay ku socdeen, waxa ay la kulmeen muuqaal ay ku diirsadeen, oo farxad geliyay, waxa socda abaabul iyo is-diyaarin aad u heer sareysa, mucaskaraadkii ama xarumihii tababarka ciidanka ayaa wada camiran, bari iyo galbeedba waa la isaga yimid, Maxaa dhalinyar ah! Maxaa odayaal ah! Maxaa rag iyo haween qiimo iyo qaayo leh meesha jooga! Ma qiyaasi karayno.
Waxa soo ajiibay baaqan jihaadka kumanaan qof oo aad u qiimo badan, xagan hadii aan eegno waxa ka muuqda xasan-wadaad, waa nin aad u akhlaaq wanaagsan, dhibirsan, oo fahamka diinta aad ugu fiican, xagan kale waxa jooga macalinkiisii uu cilmiga diinta wax badan ka soo faa’iideystay, waxa ku xiga axmed-yare, waa xaafid, marka uu Qur’aanka akhrinayo waxaa aad ku siganaysaa in aad oydo, codkiisu waa mid aad u cajab badan, halkan kale waxa jooga Ingineer-faarax, waa muhaajir ka yimid yurub, waxa uu sitaa shahaadada heerka labaad ee maadiga, miyuu tirin karayaa meesha waxa hal-door isku arkay… xagaa waxa uga soo muuqata hooyo khadiija, waxa ay wadataa, oo hareeraheeda taagan, afarteedii innamood, oo uu mid waliba gaashaaman yahay, hubkiisuna u dhan yahay, soo-dhaweyn, is-hambalyeyn, salaan iyo is-bogaadin xeel-dheeraatay kadib, waxa mujaahidiintii mid kastaa tagay, halkii loo calaamadiyay…
Isaga waxa lagu qoray meel magaalada ka baxsan, waxa ku yaalla mucaskar aad u diyaarsan, oo qofkii galaa uu tababar fiican kala imanayo, in muddo ah ayuu halkaasi ku jiray, oo is-diyaarin iyo tababar-ciidan ku jiray, kadibna maalin maalmaha ka mid ah, ayaa war deg-deg ahi soo dhacay, waxa loo sheegay in mujaahidiintii safka hore joogtay, uu cadawgii soo jiidhay, oo gurmad loo baahan yahay, degdeg ayay hubkoodii u qaateen, wixii ay gaadiid haysteen ayay raxan-raxan iskugu gureen, waxay u jeedsadeen halkii cadawga loogu sheegay, goor casar gaaban ah ayay gaadheen bartii ay u socdeen, waxay ku degeen fadhiisin ay sameysteen mujaahidiinta intii ka hadhay dagaalkii shalay, waxa cadho iyo ciil ka muuqda wejiyada mujaahidiintu qiyaas ma leh!!!
Isla habeenkiiba waxa hogaankii jihaadku ku war-geliyay, in la qaadayo duulaan, oo cadawga la weerarayo, maadaama oo aanu cadawgu u diyaarsaneyn in uu habeen dagaalamo, cabsi badanina ay ku jirto, way ku siqeen… oo siqeen… ilaa ay gaadheen, oo kambalkooda degeen: (فَإِذَا نَزَلَ بِسَاحَتِهِمْ فَسَاءَ صَبَاحُ الْمُنذَرِينَ).
Markii hogaankii jihaadku kala habeeyay mujaahidiinta, oo mid walba meeshii loogu talo-galay uu dhigay, ayaa lagu war-geliyay in lagu bilaabo cadawga, kadibna waxa mar kaliya holcay jugta iyo dhawaaqa rasaasta ay ku af-rogeen cadawgii! Bum! Bum! Bum! Bac! Bac! Bac! Cabaadka iyo foodhida baxaysa miyaad qiyaasi kareysaa, Ku soco! Ku soco! Taqadam… Taqadam…
}قَالَ رَجُلَانِ مِنَ الَّذِينَ يَخَافُونَ أَنْعَمَ اللَّهُ عَلَيْهِمَا ادْخُلُوا عَلَيْهِمُ الْبَابَ فَإِذَا دَخَلْتُمُوهُ فَإِنَّكُمْ غَالِبُونَ ۚ وَعَلَى اللَّهِ فَتَوَكَّلُوا إِن كُنتُم مُّؤْمِنِينَ {(23)
Cadawgii argagax iyo anfariir ayaa qabsaday, habqankoodii ayaa batay, meel ay xabaddu kaga soo dhacaysaba way kala garan waayeen, kadibna fadhaqa ayaa ay tiiriyeen, oodaha iyo dhagaxaanta ayaa ay isku maqiiqeen, oo ay waddo ka dhigteen, xidhadhka iyo meelihii jiqda ahaa ayaa banaan u noqday, oo ay jiidhsiiyeen, ilaa uu waagu baryayay cadawgii way eryanayeen, meydkoodii ayaa batay, dhaawacoodii ayaa af walba ku ooyay, nimanku afaf badanaa, oo baroor badanaa, oo adkeysi daranaa, af-shaydaan iyo af-insiba way ku ooyeen, sidii shimbiraha ayaa uu midba meel ka ciyay.
Subaxii waxay ku waaberiisteen guul iyo farxad, iyo cadawgii oo ay ka adkaadeen, todobaad kadib waxay hadana weerareen mid ka mid ah fadhiisimihii cadawga, sidii oo kale ayay eryadeen, oo ay ka guuleysteen, waxa ay isku qanciyeen xoreyn, gaar ahaan isagu wuxuu u qaatay in sidan oo kale dagaalku u socon doono, laakiin arrinku sidaa wuu iska bedelay, cadawgii wuxuu u qayshaday, oo uu gurmad u dirtay, saaxiibadiisii kufaarta ee Reer-Galbeedka ahaa.
Waxa maalin maalmaha ka mid ah helay dhacdo aad u layaab badan, meel aan ka fogeyn waxa taagan gaadhi, gaadhiga waxa saaran mujaahidiin qiimo badan, oo aanu halkani kaga dhamaanayn in uu xuso wanaagoodii iyo geesinimadoodii, waxa ka mid ah Maxamed, waa nin kaftan badan, had iyo goor jecel in uu mujaahidiinta ka farxiyo, oo uu ilowsiiyo dhibkii dagaalka, waxa kale oo isna saaran sheekh-jaamac, waa sheekh aad iyo aad ugu fogaaday diinta, mar kasta oo ay sii baxayaan, waxa uu xasuusin jiray talo-saarashada Rabbi Weynaa Oo Wanaagsanaaye, waxa uu u gali jiray muxaadarooyin aad u saameyn badan, oo dareenkooda kicin jiray, iyo rag badan oo kale oo dhamaantood ay wajiyadoodii ku sii sawiran yihiin, kadibna hal mar ayaa waxa ay ku war heleen dhawaq aad u weyn iyo uuro ama qiiq kala qariyay, in woxogaa ah ayay haab-haabanayeen dhulka, oo ay garan la’ayeen meel ay u dhaqaaqaan, markii uu qiiqii kala fadhiistay, waxa ay arkeen meeshii uu gaadhigu taagnaa oo ceel noqotay, midabkii ciiduna uu noqday madaw.
Waar raggii gaadhiga saarnaa meeye? Mooji! meel ay mareen? maxay iyaga ka sheegi, gaadhiga laftiisii ayaanay ka haynin bir iyo baloon midna, oo aanay jirin wax hadhaa ah, oo ay tilmaami karaan, Allaah naxdin weynaa, oo ciil badanaa, waar bal imika raggi mee? xageynu ku tirinaa, ileyn meydna waa dan’e!!!
Waxa loo sheegay; in uu gaadhiga ku dhacay gantaal laga soo riday diyaarad nooceedu yahay kuwa aan duuliyaha lahayn, ee ay gaaaladu adeegsadaan, waxa uu sawirtay gaalkaa gantaalka riday xaaladiisa: waa gaal nijaas ah, oo aan akhlaaq iyo edaab midna lahayn, bal ragga uu laayay eeg! waa haldoor, waa rag maanta cid inoo badasha aynaan helayn, hadii la helana koleyba la tabayo!!! gaal-gaal dhalay dheh!!! Illaahay naarta kugu fogee… wuxuu is-weydiiyay; koley si humaag ah ayaa uu idiin arkaayaye, oo ileyn haldoorka fuushanaa hadii uu og yahay, muu rideene! Toloow! Ma isaga oo saambuuse iyo haambeegar iyo shaah isku dhuuqaya ayuu taabtay batankii laga ridayay, mise isaga oo dhagta ku haya telefoon uu kula sheekaysanayo tii ay xaaraanta ku wada joogeen!
Meeshii ayay iskaga yimaadeen iyaga oo aan garaneynin meel ay ku sheegaan raggii haldoorka ahaa, waxaa ay yimaadeen fadhiisinkii mujaahidiinta, wax yar kadib waxa ku bilaabmay dagaal aad u qadhaadh, show way ku daba jireen, waa cadawgii oo aad isku soo urursaday, oo inta ay tiradoodu lee’eg tahay aanad maleyn kareynin, waxa ay wataan baabuur qafilan, oo kala wada nooc-nooc ah, balse iyaguba kama liitaan, oo Rabbi Weynaa Oo Wanaagsanaaye waxa uu laabtooda ka buuxiyay, oo uu ku kabay ragganimo iyo geesinimo, waxaasi oo hub iyo ciidan ah uma arkaan wax weyn.
Waxa bilaabmay dagaalkii, jilibka ayay u aasteen, sutida ayay u qabteen, cadawgii wuu soo dhaafi kari waayeen, wuxu dalbaday gurmad, waxa dushooda yimid daryuurado heehaabaya oo aad u badan, miinooyin aad moodo foosto camiran iyo gantaalo ayay la dhaceen, Allaah nimanku xumaa, shaaga duulaya! Gacanta go’an ee bartaa ku dhacaysa! Madaxa go’an ee isaga oo indhihiisu libiqsanayaan ku garab dhacaya! Mujaahidka kuu yeedh-yeedhaya isaga oo gabigiisuba intii sare oo kaliyi hadh-dhay, Ciidankii waxa ay noqdeen baaba’a…
Intii Rabbi Weynaa Oo Wanaagsanaaye uu maalin kale u dhigtay, ayaa u baxsaday xagii magaalada, markii ay magaaladii gaadheen waxay la kulmeen dhacdo aad uga yaabisay, waxa mujaahidiintii xaga sirdoonka qaabilsaneyd magaalada ku soo bandhigeen nin ay soo qabteen, oo mujaahidiinta ka mid ahaa, Illaahay cilmigiisu badana! ninkaa hadaad arki lahayd hadalkiisa iyo hab-u-dhaqankiisa, marnaba isma odhaneysid waa nin xun, dhowr goor ayay isaga kulmeen, wuxu moodi jirey mujaahidiintii waaweyneyd ee safka hore, aad ayuu u ixtiraami jiray, waxa loo sheegay in ninkan la ogaaday, isna uu qirtay, oo uu yahay basaaskii diyaarada cadawga ku soo hagay gaadhigii mujaahidiintu saarnaayeen, cajab!!!
Dhowr cisho kadib, hadana cadawgii oo sidii u hubeysan ayaa ka daba yimid, oo ugu soo galay magaaladii, kadibna way kharibeen markii ay mujaahidiintii kala firdhiyeen, qofkii ay ku arkaan magaalada, ee sunnihii ka muuqdo way dilayeen, dumarka way kufsanayeen, carruurta iyaga hadalkooda daa, Allaah nimanku cadawsanaa, oo naxariis darana, waxa helay kuwii Rabbi Weynaa Oo Wanaagsanaaye uu yidhi: (وان يظهروا عليكم لا يرقبوا فيكم الا ولا ذمة)…
Dagaalkaa isaga ah isagu wuu ku dhaawacmay, qayb jidhkiisa ka mid ah ayaa ka go’day, isaga oo arkaya ayuu iskaga tagey, muxuu ku fali! mar hadii ay ka go’day, Miyuu cuni! Mise dib bay ugu dhegeysaa, waa cagtiisii, waase yeelkeed!
Isaga iyo dhowr mujaahid oo kale ayaa yimid magaaladii kale, waxay ku degeen aqal uu lahaa mujaahidiinta mid ka mid ahi, waxay furteen tv-ga, si ay u eegaan warbaahintu waxay ka tidhi balaayadii ku dhacday magaaladii ay ka yimaadeen.
Warbaahinta badankeedii waxa ka socda aflaam musalsal ah, oo inta ay dadaal badan ku bixiyeen, ay in ka badan boqol xalqadood af-soomaali u rogeen, qaarkood waxa ka socda ciyaaro, qaar kalena waxa ay qaadaa-dhigayaan heesaha iyo fanaaniinta dabada lulaya, markii xilligii wararka ay soo gelin jireen la gaadhay, ayay hadana fureen TV-gii, waxa ay u dhigeen balayaadii ku dhacday iyo xasuuqii ba’naa ee uu cadawgu dadka muslimiinta ah u geystay sidan: “Ciidamada soomajeestayaasha oo weheshanaya kuwa nabad-ilaalinta ee caalamiga, isla markaana ay dusha ka taageerayaan diyaaradaha qumaatiga u kaca, ee ay leeyihiin ciidamada maariiniska mareykanka, ayaa waxa ay bartilmaameedsadeen godadkii iyo goobihii ay ku dhuumaaleysanayeen argagixisadu, waxa hawlgalkaasi ay ku dileen tiro badan oo argagixisada ka mid ah…”
Yaabe! Inta ay is-eegeen ayay hadana kala jeedsadeen! Wuxuu hoosta ka leeyahay: “Waar miyeydaan Illaahay ka cabsaneynin, waxa meesha ka dhacay xasuuq, cadaw ayaa walaalihii muslimiinta ku galgashay, oo dhiigooda cabay, bal miyaad ugu yaraan tirada meesha ku dhimatay oo kaliya sheegtaan, si loo ogaado xasuuqa dhacay iyo waxa ay kufaartu meesha ka sameeyeen, dhiigii walaalaha muslimiinta ayaa aad qariseen, laakiin Illaahay ayaa idinka abaal-marin doona, asturaada iyo qurxinta aad qurxinaysaan shirqoollada iyo dhagarta cadawga…”
Markii uu itaal dareeyay, isagu wuu ka hadhay camalkii jihaadka, walaalihii mujaahidiintana waxa uu kaga yimid, dardaaran iyo dhiirigelin ah: in aanu cadawgu ka adkeysi badanine, ay la sabirtamaan.
Isaga oo iska jooga magaalada, ayaa waxaa uu tegey maalin maalmaha ka mid ah, hudheel ama maqaaxi shaaha laga cabo, markii u horeysayba wuxuu saluugay qaabkii ay ula dhaqmeen askartii dibada joogtay, ee albaabka ilaalinaysay.
Waxay albaabka mar wada galeen gaal cad, oo uu u maleynayo inuu yahay maraykan, isaga ayaa ka lug horeeyay, markii ay askartii arkeen, way u qosleen, oo weji furan ayay ku qaabileen “how are you, ok, …” iyo ereyo kale oo uu fahmi waayay ayay ku salaameen, askarta mid waliba wuu is-giijinayaa, oo is-habeynayaa, isaga oo iska dhisaya gaalka, iyaga oo aan baadhin ayay ka fureen albaabka, kadibna wuu galay.
Markii uu is-yidhi gal, waa kuwaa askartii ku soo wada qaylyay “Joog! Joog waryaa…” Mid baa dib u kala tuuray, oo ku yidhi: “Xageed ku sii maqiiqan tahay! Joogso…” markii uu ku yidhi: “Oo ninkii iga horeeyayba sowkii idin dhaafay, isaga oo aydaan baadhin…”, ugamay jawaabin weydiintiisaasi.
Laba ayaa u kala dambeeyay, mid waliba gacanta iyo bir uu sitay, ayuu aad u mar-mariyay, kadibna markii ay waxba ka waayeen, way sii daayeen.
Markii uu galay gudaha, waxa uu ku arkay wax aad uga cadheysiiyay, waxa miis halkaas ah soo wada fadhiya, oo shaah ku cabaya, waliba way qos-qoslayaan, cadawgii xasuuqay muslimiinta laba ka mid ah, oo uu wejiyadooda toos u garanayo, waxa uu eegay hareerahooda, waxa iska fadh-fadhiya dumar, carruur, waayeel iyo dhalinyar rag iyo dumarba leh, oo aanay kaba qasneyn, way iska kaftamaan, way iska sheekaysanayaan ba, aad ayuu u ciishooday, wuxuu is-weydiiyay su’aalo badan; maxay ka ag qabanayaan cadawga? maxay ugu hiilin waayeen walaalihii la xasuuqay? qofka hudheelkan lihi muxuu ugu ogolaaday cadawgani inay soo galaan? waar iska aamus! waa la wada socdaa, waa gaal iyo gaal-kalkaal, waa la is-og yahay, xasuuqii dhacay hadii ay ka xun yihiin ama u arkaan xasuuq, dee cadawgani xasuuqa geystay, aayar iskamay ag-fadhiyeen…
Wuxuu isku qanciyay in uu walaalihii mujaahidiinta kaga filnaado cadawgani, waliba waa qaar ka mid ah hogaankii cadawga kuwii ugu darnaa, ee ay mujaahidiintu ka nasan waayeen, waa kuwo uu ogahay, hadii ay cadawga ka baxaan, in ay inbadan cadawgu tebi doonaan maqnaanshahooda.
Wuu baxay isaga oo isla sii sheekaysanaya “Inbadan baad maqashay, ood maqashay… camaliyaatka istishhaadiga iyo walaalihii naftood-hurayaasha ahaa hawlgalladooda’e, maanta waa markaagii… waa markaagii…”, kadibna wuxuu tagay xarun ay mujaahidiintu ku lahaayeen magaaladan, wuxuu hadalkii ku bilaabay “Waa MARKEYGII… Waa MARKEYGII…” kadibna wuu u sharaxay wixii uu soo arkay, mujaahidiintiina way la qaateen fursadaasi iyo ka-faa’iideynteeda, way diyaariyeen, kadibna dardaarankii walaalnimada Islaamka ayaa ay sii kala qaateen, waxay isku maca-salaameeyeen “Janada ayaa inoo balan ah…“
Wuxuu kusoo noqday hudheelkii oo weli sidii loo baashaalayo, mar waxa uu xasuustaa xasuuqii iyo inta walaal ee hebel iyo hebel uu u garanayo, oo madaxooda oo go’an ama jidhkooda oo googo’an uu ka dul talaabsadey, marna waxa uu ka naxaa dadkan is-moogta ah, ee iska ag-fadhfadhiya cadawga “Bal ma iska yar sugtaa inta caruurta iyo dumarka iyo waayeelku baxayaan…” Oo waayahaye maxay iyagu ka ag-qabanayaan cadawga, maxay…? Armaa mujaahidiinta ceeb looga dhigaa, oo warbaahintii raaligelinta gaalada u heelaneyd, ee afka gaalka ku hadli jirtay, inta ay qariyaan cadawgan bartilmaameedka ah, ay soo qaataan, oo soo sawiraan meydka caruurta iyo dumarka, kadibna yidhaahdaan; Ma kuwa sidaa wax u galay ayaa Muslimiin ah? Waar waa yeelkood, dadkan cadawga iska ag-fadhfadhiya iyagaa naftooda haleeyay, mid walba camalkiisii ayaa Rabbi Weynaa Oo Wanaagsanaaye uu u xisaabin doonaa, adiguna niyadaada ayaa aad leedahay, cadawguna cadaab buu leedahay if iyo aakhiro-ba. Kadibna inta uu farta saaray qarxiyihii, ayaa uu yimid cadawga agtiisii, hadaba inta aanu taaban qarxiyaha bulshooy!!!, farriinta ama dardaaranka uu idinkaga tagayo mujahidkani waxa weeyi: “Waar hooooooooooooooy! oo hoooooooooooooooy! ka fogaada cadawga… ka fogaada daalimiinta… iska ilaali inaad la heshiiso, oo aad la saaxiibto, oo aad la hawlgasho cadawga muslimiinta… isagana u soo duceeya inuu Rabbi Weynaa Oo Wanaagsanaaye uu camalkan ka aqbalo…” Bum! Buuuuuum! Buuuuuuuuuuum!
لَّا يَتَّخِذِ الْمُؤْمِنُونَ الْكَافِرِينَ أَوْلِيَاءَ مِن دُونِ الْمُؤْمِنِينَ ۖ وَمَن يَفْعَلْ ذَٰلِكَ فَلَيْسَ مِنَ اللَّهِ فِي شَيْءٍ إِلَّا أَن تَتَّقُوا مِنْهُمْ تُقَاةً ۗ وَيُحَذِّرُكُمُ اللَّهُ نَفْسَهُ ۗ وَإِلَى اللَّهِ الْمَصِيرُ)28 (قُلْ إِن تُخْفُوا مَا فِي صُدُورِكُمْ أَوْ تُبْدُوهُ يَعْلَمْهُ اللَّهُ ۗ وَيَعْلَمُ مَا فِي السَّمَاوَاتِ وَمَا فِي الْأَرْضِ ۗ وَاللَّهُ عَلَىٰ كُلِّ شَيْءٍ قَدِيرٌ(29) عمران
